Choti Maa

By |2020-02-06T07:24:04+00:00February 6th, 2020|Inspiring Story|

School ke wo din yaad hain? Jab ghanti bajte hi daud kar gate ke bahar us imli wale ke paas jaate the.  Aakhon mein wo maasomiyat aur jeebh imli khaane se pehle hi chatkaare leti hui, ki bas ye mil jaye toh har khwahish poori! Haath badhaya hi tha mene wo kaagaz pakadne ko aur uske upar laal imli, ki peeche se koi apni taraf kheechne laga. Unhone jo mera haath pakda, seedha school se ghar laa kar hi chhoda. Bas itni hi wajah bahut hoti hai bachpan mei maa se ruth jaane ke liye.

Mai bhaag kar gayi apne ghar se “unke” ghar par, apne doosre ghar par. Ye doosra wala ghar zara chhota tha… yahan rehne wale logon ke liye nahin, yahan jitni khushiyan milti thi, unhe sahejne ke liye! Ghar mei kadam rakhte hi meri man-pasand khushboo aayi aur ek kamre se unki aawaaz, “Aa gayi?” Mene pucha, “Kadhi chawal?” aur choti maa ne halki si muskaan ke saath kaha, ”haan!”

Us man-mugdh karne wali khushboo ke vash se bahar aayi bhi nahi thi ki mujhe apni maa ki paayal ki aawaaz sunayi di. Mai daud kar choti maa ke aanchal ke peeche chip gayi. April ke sooraj si tamtamaati hui meri maa boli, ”Tune hi bigaad rakha hai isse. Dono maa-beti ne mujhe pareshaan kar rakha hai!” Choti maa ne mudd kar meri taraf dekha aur maine unke aanchal ke peeche se unki taraf. “Jeeji, ap fikr naa karei, mai bhejti hu abhi isse”, unhone maa se kaha.

Unke kadhi chawal ka swaad ekdum maa jesa hi tha, magar unke haathon ka swaad chammach se kaafi behtar! “Kese bane hain?”, ek ummeed se unhone pucha. “Sabse acche, choti maa!” Shaam hote hote wo mujhe chodd kar aane ko bahaar nikli toh wahi roz ki ghoorti nigaahei, ek doosre ke kaan mei fus-fusaana. Us waqt sochti thi ki kuch toh baat hai meri choti maa mei, jo bina kuch kiye hi sabki nigaahei unpar aa tikti hain.

Magar ab, ab samajhti hun… samajhti hun ki mai jitna ansh maa ka hun, utna hi choti maa ka bhi, samajhti hun ki jab maa is kaabil nahi thi, toh mujhe ghar choti maa ne diya tha… 9 mahino ke liye! Aur fir kese saunp dia tha maa ke haathon mei. Bilkul wese hi jaise sheher ke kitne ladke-ladkiyon ko unhone ghar diya aur fir chodd dia, 9 mahino baad. Unhi ladko ko, unhi ladkiyon ko, jinki maa ki tiraskar bhari nigaahei ab choti maa se hatti nahin, aur na hatta hai unki baaton se choti maa ka zikr.

“Itni himmat kahan se laati ho choti maa?”, ek din maine unse pucha. Aakhon mei paani liye unhone jawaab diya,”Kabhi us maa ke chehre ki maayusi dekhna jo maa banne ko betaab ho magar majboor ho, aur fir us maa ke chehre ki khushi dekhna jiski baazuon mei uska bacha ho. Bas ye jo safar hai naa, maayusi se khushi ka – ye hai meri taaqat!”

Saalo pehle maa se pucha tha,”Aapne superman ko dekha hai?” Unhone mujhe choti maa ke ghar ki dehleez par laa kar khada kar diya tha, aur kaha tha,”Super’man’ toh nahin, maine super’woman’ ko zaroor dekha hai!”

Honge apke superhero ke paas superpowers ya cape… meri superhero ke paas ek bada dil hai, aur usse bhi bada mamta ka aanchal!

0

About the Author:

Leave A Comment